Реал Мадрид фуриозно го започнува остатокот од сезоната. Борбата за пет трофеи започнува со три натпревари во девет дена и трката со Барселона, која има два бода повеќе од актуелниот шампион на врвот во „Ла Лига“.

Утре гостуваат кај Ваљадолид во 15 коло, потоа на 3 јануари играчите на Карло Анчелоти ќе играат против нисколигашот Касерењо во Кралскиот куп, а на 7 јануари ќе ја завршат серијата од три гостувања кај Виљареал во првенството.

– Започнуваме маратон во кој ќе се бориме за пет трофеи во следните два и пол месеци: Ла Лига, Кралскиот куп, Лигата на шампионите, Суперкупот на Шпанија и Светското клупско првенство. Нема одмор бидејќи играме на секои три дена до 19 февруари. Сите играчи се вратија по Мундијалот во Катар. Последни ни се приклучија Модриќ, Чуамени и Камавинга, но нема да играат во Ваљадолид – рече Анчелоти.

Италијанскиот тренер кажа каква е состојбата на играчите по враќањето од СП.

– Многу добро. Успеавме да го опоравиме Бензема, кој ни е исклучително важен. Сите што беа на одмор се вратија во добра форма, но приоритет ќе им дадам на оние кои беа тука цело време – вели Анчелоти.

Многу се зборуваше и пишуваше за Бензема и неговата огорченост што не беше вклучен во француската репрезентација за финалето на СП?

– Воопшто не разговаравме за тоа. Знам дека во него имам многу мотивиран играч и убеден сум дека ќе ни донесе многу добри работи во вториот дел од сезоната.

Ќе донесете ли засилувања во зимскиот преоден рок?

– Имаме одличен тим и тоа поглавје е затворено. Не го знам единственото нешто за заминувањата бидејќи некои фудбалери кои играат помалку можеби ќе сакаат да одат.

Бразил е заинтересиран да бидете нивни селектор?

– Уште не ми се јавија, но мило ми е што се заинтересирани. Мојата ситуација е јасна. Јас сум тренер на Реал Мадрид и никогаш не би ја прекинал соработката со клубот.

Дали Меси е најдобар во историјата?

– Не е фер да се каже дека е најдобар затоа што секоја ера има одлични фудбалери. На пример, јас ја тренирам „Златната топка“ (Карим Бензема) секој ден.