Алкараз: Не верувам дека можеме да го повториме успехот на Рафа, Новак и Рожер

Карлос Алкараз годинава победи на четири турнири, од кои два се од серијата Мастерс 1000/фото: EPA-EFE/ANDY RAIN

Шпанската тениска сензација Карлос Алкараз смета дека рекордите на Рожер Федерер, Новак Ѓоковиќ и Рафаел Надал уште долго време ќе бидат недостижни за тенисерите.

Големата тениска тројка во изминатите две децении поставија неверојатни рекорди кои според Алкараз е невозможно да се достигнат.

Од 2008 година па досега Надал, Федерер и Ѓоковиќ освоија 48 гренд слем титули, додека останатите тенисери само 10 пати ги креваа шампионските пехари на најголемите тениски турнири.

– Мислам дека нема никакви шанси да го повториме тоа што го направија Рожер, Рафа и Новак. Не станува збор за недостаток на самодоверка или за нашата способност. Ниту јас, ниту било кој од моите колеги нема да го постигнеме тоа што го направија овие тројца великани – вели Алкараз.

Иако постојано зборува дека има големи амбиции, Алкараз кој годинава направи одлични резултати триумфирајќи на два мастерс турнири, разбира колку е тешко да се стигне до самиот врв.

– Тука зборуваме за невозможни достигнувања. Такво нешто воопшто не ми е на ум во овој момент. Повеќе би сакал да застанам цврсто на земја и да размислувам за сегашноста – вели Алкараз.

Видео на денот