Локалната акциона група „Агро лидер“ во партнерство со ППМ „Енклава“ од Белград, а како дел од проектот „Регионална мрежа за културна разновидност“ (READ – Regional Network for Cultural Diversity), поддржан од Европската Унија, ja објави книгата „Мајка ми знае што се случува по градовите“ на српската поетеса Радмила Петровиќ на македонски јазик.

Проектот е посветен на промоцијата на современата балканска рурална поезија. Препевот на стиховите е на Драгица Јорданоска, Драгица Здравеска и Звонко Димоски, јазичната редакција е на Димитар Ѓорѓиевски, а дизајнот на корицата на Хајдана Костиќ.

Поетесата Радмила Петровиќ (1996, Ужице) пораснала во Ступчевиќи во близина на Арилја. Како лауреатка на 42-те Лимски поетски вечери ја објавува збирката поезија „Мирисот на земјата“ (2014), а како победничка на 22. Поетски конкурс „Десанка Максимовиќ“ збирката „Целулозен рокенрол“ (2015). Нејзината трета збирка „Мајка ми знае што се случува по градовите“ ја објавува ППН „Енклава“ (2020) и постигнува голем комерцијален успех.

Искреноста на стиховите на Петровиќ ја прават блиска и прифатлива за младата публика. Нејзината поезија на посебен начин го соединува искуството на градот и современите мотиви со поими својствени за традиционалниот селски амбиент, создавајќи еден специфичен меѓупростор во кој ги преиспитува востановените модели на двете средини.

(Текстот е објавен во „Културен печат“ број 85, во печатеното издание на „Слободен печат“ на 18-20 јуни 2021)