По поднесена кривична пријава од СВР Струмица, денеска струмичкото Основно јавно обвинителство отвори предмет против 22 лица – учесници во тепачката која се случи во овој град на 18 март 2021 година.

Како што информира Јавното обвинителство, од осомничените, 12 лица се пријавени за сторено кривично дело „спречување на службено лице во вршење службено дејствие” од член 382 , а останатите десетмина за сторено кривично дело „насилство” од член 386 од Кривичниот законик.

– Јавен обвинител од Основното јавно обвинителство Струмица во континуитет презема дејствија за расчистување на настанот. Издадени се наредби за вештачење, за прибирање на медицинска документација и други материјални докази. Во насока на утврдување на фактите во предметот, ќе бидат сослушани осомничени и сведоци, односно повеќе лица кои можат да дадат податоци за настанот, се наведува во соопштението.