Извештај на американското разузнавање протече оваа недела со проценка дека Кабул може да биде нападнат за неколку недели и дека владата може да падне во рок од 90 дена. Како се случи ова толку брзо, прашува британскиот светски сервис Би -Би -Си.

САД и нивните сојузници во НАТО поминаа поголем дел од изминатите 20 години во обука и опремување на авганистанските безбедносни сили. Бројни американски и британски генерали тврдеа дека создале помоќна и поспособна авганистанска армија, ветувања и проценки кои денеска изгледаат прилично нереални.

Авганистанската влада во теорија треба да продолжи да има предност поради поголемата моќ што ја има на располагање.

Авганистанските безбедносни сили бројат повеќе од 300.000 луѓе, барем на хартија. Тука спаѓаат авганистанската војска, воздухопловните сили и полицијата. Но, во реалноста, отсекогаш имало проблеми со исполнување на целите за доволен број на регрути, констатира Би -Би -Си.

Авганистанската армија и полиција имаат историја на големи жртви, напуштања, дезертерство и корупција. Некои бескрупулозни команданти ги чуваа за себе платите на војниците кои едноставно не постоеја – таканаречените „војници -духови“.

Во својот последен извештај до американскиот Конгрес, специјалниот главен инспектор за Авганистан (СИГАР) изрази сериозна загриженост за корпутивните ефекти и укажа на сомнителната точност на податоците за вистинската сила на војниците на авганистанската армија.

Дури и самата авганистанска армија никогаш не била сигурна колкава е бројноста на војниците .

Покрај тоа, се наведува и дека имало проблеми со одржувањето на опремата и моралот. Војниците честопати се испраќаат во области каде што немаат племенски или семејни врски.

Тоа е една од причините зошто некои можеби толку брзо ги напуштија своите позиции без борба.

Од друга страна воопшто не е познато колкава е бројноста на талибанските војници. Според американскиот антитерористички центар во Вест Поинт, проценките укажуваат на бројка од 60.000 борци.

Заедно со другите милициски групи и поддржувачи, тој број може да надмине 200.000 вооружени милитанти.

Авганистанската влада треба да има приоритет во однос на финансирањето и вооружувањето. Таа доби милијарди долари воени плати и опрема, главно од Соединетите Држави.

Во својот извештај од јули 2021 година, СИГАР објавија дека се потрошени повеќе од 88 милијарди долари за авганистанска безбедност.

„На прашањето дали тие пари се добро потрошени, на крајот ќе одговори на исходот од борбите на теренот“, констатираат американски и британски воени експерти за западните медиуми.

Талибанците се на 50 километри од главниот град, европските земји ги затвораат амбасадите во Кабул