Јурида Красниќи е жена која управува со ресторан во албанскиот град Ќерет, Каваја. Овој бизнис функционира веќе 18 години во Ќерет, но Красниќи вели дека туризмот никогаш не бил полош од оваа година.

– Го имаме овој бизнис веќе 18 години и да, ја зборувам вистината, мислам дека годинава туризмот е многу лош и никој не размислува за тоа – вели таа, пренесува Газета експрес.

Красниќи дава неколку можни причини зошто тоа се случува.

– Мислам дека ова дојде поради политиката тука во Албанија, бројните протести доведоа до тоа странските туристи да не се веќе заинтересирани за Албанија, а како резултат на тоа и работата на многу ресторани падна. Политиката на оваа земја направи сè да тргне наопаку, никој не е заинтересиран за бизнисите, освен делот за да си земаат повеќе даноци отколку што треба и да отвориме само проблеми, а тоа води и кон затворање на многу локали – вели таа.

Недостигот на туристи, вели таа, нема никаква врска со промените на цените, бидејќи според неа, цените продолжуваат да бидат истите како и во изминатите години.