Здружението на џез-музичари и слободни уметници – ЗЏМ е основано во 2016 година и од почетокот на својата активност, меѓу другите настапи, го одбележува и Интернационалниот ден на џезот – 30 април. Поради ситуацијата со коронавирусот, годинава џез-денот имаше две одбележувања.

Првото се случи во рамките на програмата „Култура во време на корона“ на Град Скопје, кога „ЗЏМ Колектив“ настапи без публика пред МКЦ, а концертот беше пренесуван со стриминг на интернет. Концертот во Сули ан може да се смета за второ одбележување на денот, бидејќи беше изведен со наслов „Today it’s all about jazz“, а разликата меѓу првиот и вториот концерт ја направи присуството на публиката. Тој момент беше особено важен за музичарите на сцена.

– Секако, присуството на публиката е бесценето. Чувството дека има за кого да свириш, како и можноста за заемно споделување на енергијата е разликата меѓу овие два настапa. Сѐ е различно, би рекол дека во голем процент реакцијата на публиката и амбиентот што се создава на лице место се клучот за добар концерт! – вели Гоце Стевковски од „ЗЏМ Колектив“.

Осум нови композиции на членови на Здружението на џез-музичари беа изведени на концертот. Колективот е со отворен формат, а повремено прераснува во „ЗЏМ Биг бенд“. По само четири години од основањето на Здружението, ефектите се видливи и повеќезначни.

– Мислам дека поттикнавме една нова енергија и направиме многу концерти. Како најзначајно сметам дека е создавањето на „ЗЏМ Биг бенд“, единствен оркестар од тој формат во Македонија, кој имаше неколку брилијантни настапи во МОБ, Филхармонија, „Охридско лето“, „Прилеп џез викенд“. Го основавме и џез фестивалот „Today it’s all about jazz“, што се одржува на 30 април, на кој настапиле сите македонски џез-групи. Биг бендот настапил под диригентство на Зиги Фајгл и Џијан Емин, а гостувале и светските легенди Дон Менза, Лео Геновезе, Хаџиманов, Заберски-Јосифов квартет и многу други.

Меѓу ефектите што ги постигнавме со основањето на ЗЏМ е и зачленувањето во Европската џез-мрежа, каде што сме членки со уште 140 организации. Здружението е составено од професионални џез-музичари, кои се докажани во својата работа, и ужива огромна поддршка, а доказ за тоа е многубројната публика на концертите. Затоа мислам дека медиумите, културните институции и министерствата треба да имаат поголема улога во препознавањето на квалитетот и со тоа да ја дадат соодветната поддршка за македонската култура – посочи Стевковски.

Концертот на „Скопско лето“ ги врати џез-музичарите „во живот“. Покрај искрената благодарност на аплаузот од публиката, тие со еден цитат ја објаснија суштината на нивната работа: „нема музика – не го разбирам животот; има музика – сѐ ми е јасно“.

(Текстот е објавен во „Културен печат“ број 40, во печатеното издание на „Слободен печат“ на 18-19 јули 2020)