Одлуката на Жалбениот совет на Меѓународниот кривичен трибунал за поранешна Југославија (МКТЈ) да ја потврди доживотната казна затвор на поранешниот командант на српската војска во Босна и Херцеговина Ратко Младиќ е доказ дека меѓународните институции што ги испитуваат и гонат кривични дела во поранешна Југославија покажуваат пристрасност. Ова го изјави во коментар официјалната портпаролка на руското Министерство за надворешни работи Марија Захарова.

„Казната на Ратко Младиќ уште еднаш демонстрира дека активностите на меѓународните механизми за изведување пред лицето на правдата на одговорните за злосторствата извршени за време на граѓанската војна во поранешна Југославија, всушност се карактеризираат со пристрасност кон една од страните во конфликтот”, рече Захарова, пренесува БГНЕС.

Захарова, исто така, рече дека казната на Младиќ изгледа особено лицемерна по ослободителната пресуда од хашката правда за босански, хрватски и косовски војници.

Според неа, ова ги попречува напорите за враќање на довербата во регионот на Балканот.