Во Сопиште во тек е изградбата на новиот објект на градинката „Виножито“, втор објект за згрижување деца од предучилишна возраст во оваа Општина. Вчера на увид на градежните работи беше министерката за труд и социјална политика Јагода Шахпаска.

Таа информира дека новата градинка има капацитет да згрижи 57 деца, кои ќе бидат организирани во три групи – две за деца од две до шест години, а третата група e за јасли. Според динамиката на активностите, објектот треба да биде завршен за најмногу еден месец.

– Министерството за труд и социјална политика од својот буџет издвои околу 21 милион денари за нејзината изградба и опремување. Според направениот увид на терен, градежните работи се во завршна фаза, во моментот се привршува внатрешното уредување, а истовремено се работи и на уредување на дворот. За нас секое дете е важно, бидејќи колку порано влезе во воспитно-образовниот процес, толку поподготвено ќе влезе и во образовниот процес – истакна Шахпаска.

Таа додаде дека Министерството и Владата планираат да изградат градинки во сите делови на државата и до завршување на мандатот во 2024 година, 60 отсто од децата од предучилишна возраст да бидат сместени во градинки.

– Досега во употреба пуштивме 14 градинки, а до крајот на годината ќе бидат отворени уште 11 нови објекти, еден од нив е и оваа градинка – рече Шахпаска.

Новата градинка во Сопиште е самостоен проект на Министерството за труд и социјална политика како дел од Програмата за изградба, опремување и одржување објекти за детска заштита за 2020 година.