Познатиот писател за деца Васил Мукаетов со книгата „Колку да се рече…“ го откриваме во поинаква светлина. Книгата содржи многубројни записи и видувања за општествените прилики и критички фрагменти објавени во македонските печатени гласила, но и литературни објави и осврти од книжевни критичари, како Глигор Поповски, Томе Арсовски, Атанас Вангелов, Весна Мојсова-Чепишевска, Горјан Петрески, Васил Тоциновски, Стојан Тарапуза, Тамара Арсовска, Ермис Лафазановски, Велко Неделковски, Мишо Китановски за поетските книги на Мукаетов.

Издавач на второто дополнето издание на книгата „Колку да се рече…“ е Градската библиотека „Феткин“ од Кавадарци. Со своите читатели Мукаетов другарува уште од 60-тите години на минатиот век преку страниците на списанијата „Другарче“, „Колибри“, „Развигор“, досега има објавено повеќе од 20 книги за деца, а застапен е и во повеќе учебници по македонски јазик и литература за основното образование. Член е на Друштвото на писателите на Македонија, а во 2017 година ја доби наградата за најдобра книга за деца „Ванчо Николески“ на ДПМ за стихозбирката „Скокни прескокни“.

(Текстот е објавен во „Културен печат“ број 63, во новогодишниот број на печатеното издание на „Слободен печат“ на 31 декември 2020 – 3 јануари 2021)