Индиските возови прегазиле повеќе од 13.000 говеда во 2022 година, според податоците објавени од владата, пренесува „Би-Би-Си“.

Ова е за 24 отсто повеќе од 2019 година, кога 10.609 говеда биле прегазени од возовите, според бројките што ги споделија девет од 17 железнички зони во Индија.

Ваквите судири не се новост во Индија, иако медиумската контрола на овие смртни случаи се зголеми во текот на изминатите неколку години, бидејќи земјата лансираше понови, поубави возови.

Во 2019 година, возот „Ванде Бхарат експрес“ се расипал само еден ден откако премиерот Нарендра Моди го пушти во употреба. Во тоа време, портпаролот на железницата беше цитиран како рекол дека возот можеби удрил во добиток на пругата.

Минатиот октомври, возовите на „Ванде Бхарат експрес“ трипати погодиле говеда во западната држава Гуџарат, предизвикувајќи одложувања и штети. И минатата недела, уште еден воз претрпел оштетувања откако налетал на добиток за време на пробното возење пред неговото планирано лансирање.

Илјадници Индијци го носат својот добиток на пасење на тревите покрај железничките пруги. Многу сопственици на добиток, исто така, живеат блиску до шините или го стадаат својот добиток преку железничките пруги за брзо да стигнат од едно до друго место.

Огромната мрежа на Индиските железници која во голема мера го пробива руралниот пејзаж е речиси целосно неоградена и им овозможува на говедата од секаков вид слободно да шетаат низ шините. Говедата што пасат трева покрај пругите често завршуваат на шините.

Во соопштението за печатот на железницата издадено минатиот октомври се вели дека таквите инциденти „негативно влијаеле на железничките операции“ и ја зголемиле „можноста за железнички несреќи, вклучително и излетување од шините“.

Во соопштението понатаму се наведува дека овие несреќи „ја загрозуваат безбедноста на патниците и може да доведат до нарушување на железничкиот сообраќај и губење на имотот на железницата“.