Вкупно 13 лица беа уапсени во Данска за нивната наводна улога во шверц на фалсификувани цигари произведени во тајна фабрика, наменета за Велика Британија.

Навремената размена на разузнавачки информации преку Европол меѓу дански, холандски и полски истражители беше од суштинско значење за успехот на истрагата спроведена во рамките на Европската мултидисциплинарна платформа против криминални закани (ЕМПАКТ), се вели во соопштението на Европол.

Првата акција беше на 2 март во Данска, каде беше демонтрирана нелегална фабрика во општина Вамдруп. Тоа е прв случај на демонтирање нелегална фабрика во таа држава.

Уапсени се 13 лица од полска и украинска националност и запленети се 11 милиони цигари, заедно со 11 тони суров тутун и комплетна линија за производство. Вредноста на запленетите производи од тутун на илегалниот пазар на Велика Британија е околу 13 милиони евра.