ВМРО-ДПМНЕ ги усвои пратеничките листи на денешната седница на Извршниот комитет на партијата. Членот на Извршниот комитет, Тимчо Муцунски, во изјава за медиумите вели дека ова биле победнички листи и се надеваат на поддршка од граѓаните.

„Овие избори се всушност одлука за тоа каква Македонија сакаме. Нивната, таа на власта, затворена, омаловажена, криминализирана, или онаа Македонија каква народот ја сака, и за каква се бориме. Македонија со надеж, иднина и сигурност.Македонија која ќе биде повторно на народот, институциите ќе бидат функционални, системот ќе биде нормализиран.Народот бара и очекува одговорност, бара и очекува принципи и враќање на вредностите во политиката“ – рече членот на ИК на ВМРО-ДПМНЕ Тимчо Муцунски.

Муцунски вели дека при составувањето на листите, воделе смета за гласот на народот, барањата и потребите.

“Носителите на овие победнички листи се: Во првата изборна единица е лидерот на ВМРО-ДПМНЕ Христијан Мицкоски каде очекуваме огромна поддршка и огромна победа. Втората изборна е мојот колега и пријател Владо Мисајловски. Третата изборна единица е Драган Ковачки. Четвртата изборна единица е потпретседателот Александар Николоски. Петата изборна единица генералниот секретар на ВМРО-ДПМНЕ Ѓорѓија Сајкоски. И шестата изборна единица каде очекуваме исто така убедлива доминација во однос на СДС е Дафина Стојановска“, рече Муцунски.