Продажбата на Њукасл на конзорциумот ПИФ „Public Investment Fund“ кој е под контрола на саудискиот принц сè уште не е официјална, а во Англија се зголемува отпорот против оваа инвестиција на Бин Салман.

Уште еден глас против преземањето на клубот од страна на саудискиот престолонаследник дојде од група парламентарци кои во писмо испратено до Владата изразија загриженост за продажбата на Њукасл.

Помеѓу 16. потписници се наоѓа и поранешниот лидер на лабуристите Нил Кинок, кој според англиските медиуми ја повика Владата да ја преземе главната улога во спречувањето на, како што пишува во писмото, перењето на пари преку спортот во Велика Британија.

Претходно беше договорено ПИФ за сума од 300 милиони евра да го купи Њукасл и ќе добие 80 проценти од акциите, додека малцински сопственици треба да бидат посредничката во преговорите Аманда Стејвли и браќата Рубен.

Противниците на влезот на саудискиот принц во англискиот фудбал се повикуваат и на извештаите на организациите за човекови права, но највеќе поради убиството на новинарот Џамал Кашоги во 2018 година кое се случи во конзулатот на Саудиска Арабија во Истанбул.

Освен парламентарците, борците за човекови права и вереничката на Кашоги, уште еден адут кој во борбата против преземањето на Њукасл е кражбата на ТВ правата за Премиер лигата.

Катарската телевизија БеИн Спортс која ги има ТВ правата за Премиер лигата за тој регион, ги обвини Саудијците за пиратерија, односно илегално емитување на натпреварите од Премиер лигата.

Засега англиската влада нема намера да се меша во продажбата на Њукасл и според секретарот во министерството за спорт и култура, Оливер Дауден, ќе остават прашањето да го реши самата Премиер лига, но не исклучува да реагираат во подоцнежната фаза од преземањето на клубот.