Холандските власти го затворија стадионот „Гоферт“ во Нијмеген откако пред два дена за време на натпреварот помеѓу НЕЦ и Витесе во рамки на деветтото коло од Ередивизијата, се сруши дел од трибината.

Веднаш откако судијата отсвири крај на натпреварот, гостинските навивачи почнаа да скокаат и да ја слават победата на нивните фудбалери. Дел од нив се качија на оградата и тогаш се урна дел од трибината, но за среќа беше избегната трагедија и никој не беше повреден.

„Бидејќи не знаеме зошто се сруши дел од трибината, мораме да го затвориме стадионот. Доколку тоа не го направиме, ќе биде загрозена безбедноста на навивачите. Кога ќе бидеме сигурни дека стадионот 100 проценти е сигурен за навивачите, повторно ќе го отвориме“, објавија градските власти.

Во НЕЦ се согласуваат со одлуката на градските власти бидејќи безбедноста на навивачите е најважна.
– Ја разбираме одлуката на градските власти да го затворат стадионот. Најважно е да се спроведе детална истрага, а во исто време оваа одлука за нас значи дека ќе мора да побараме друг стадион за одигрување на домашните натпревари – изјави Ник ван дер Камен, портпарлот на НЕЦ.

The Vitesse celebrations at NEC earlier today…pic.twitter.com/9EkeUguVaa

— The Set Pieces (@thesetpieces) October 17, 2021