Натпреварот помеѓу Асколи и Салернитана во Серија Б, никој нема да го памети по головите, шансите или победата на гостите бидејќи тоа што го одбележа е несреќата на младиот полски фудбалер, Патрик Џичек.

Џичек кој настапува за Салернитана како позајмен фудбалер од Лацио, во 70. минута од натпреварот, се сруши на теренот и почна да се тресе. Веднаш притрчаа фудбалерите на двете екипи како и лекарите, а на крајот влезе и возило на брзата помош со кое е однесен во болница во Асколи.
Набрзо пристигнаа добри вести од болницата, Џичек ја повратил свеста и се чувствува добро, но клупскиот лекар открива дека и на подготовките се случила иста сцена.

Cholera, dramatyczne sceny… pic.twitter.com/62WuPRzgTs

— Piotr Borkowski (@BorkowskiPiotr) February 20, 2021

– Имавме сличен инцидент во септември. Потоа следеа многу тестови и прегледи на кои не успеавме да ја најдеме причината. Сега се наоѓа во болницата „Мацони“ во Асколи, нема потреба да се користи дефибрилатор бидејќи нема проблеми со срцето. На теренот му го извадивме јазикот за да не задуши по нападот на епилепсија – објасни докторот на Салернитана, Епифано Дариго.

Според докторот, младиот полски фудбалер кој во март ќе наполни 23. години, нема да добие зелено светло да се врати на терените се додека не се открие причината за неговите проблеми со здравјето.