Фудбалерите на Франција во големото дерби на првото коло на Европското певенство со 1:0 ја совладаа Германија во Минхен. Единствениот гол беше постигнат во 20 минута и тоа кога германскиот дефанзивец Матс Хумелс со лоша реакција го совлада Мануел Ноер.

За тоа колку Франција беше подобар противник на теренот во Минхен најдобро говорат податоците дека ВАР технологијата им поништи два гола, на Мбапе и на Бензема како и тоа што Германија не упати ниту еден удар во рамките на голот на Уго Лорис.

На стартот Германија имаше блага иницијатива, имаше поголем посед на топката и неколку напади но изостана конкретната завршницата. Французите беа први кои посериозно се заканија, во 17 минута шутот на Килијан Мбапе го одбрани Ноер. Но три минути подоцна Франција поведе по одлична акција во која Пол Погба го проигра Лукас Ернандез кој центрираше во петерецот на Ноер, а Матс Хумелс неспретно ја смести топката во сопствената мрежа.

До крајот на наптреварот, Германците имаа поголем посед на топката, но не успеаја да создадат ниту една шанса, додека Франција својата шанса ја бараше преку брзите контранапади. Токму на таков начин „триколорите“ постигнаа два гола преку Мбапе и Бензема кои беа поништени по сугестија на ВАР собата.
Во второто коло, Франција ќе игра против Унгарија, додека Германија ја очекува уште едно големо дерби, против актуелниот европски шампион Португалија.