Студентскиот протест во Солун кој започна мирно, заврши во хаос, откако студентите почнаа да фрлаат молотови коктели, камења и шишиња, на што полицијата одговори со солзавец. Најмалку две лица, студент и полицаец беа повредени.

Студентите бараа повлекување на законот за високо образование, кој овозможува воведување полиција на универзитетите, а протестот на кој присуствуваа околу 7.000 луѓе помина во судир со полицијата, јавуваат грчки медиуми.

Судири меѓу полицијата и студентите се случија пред Универзитетот Аристотел, но и на повеќе места во градот, а покрај молотовите коктели, на улиците беа поставени и барикади со контејнери.

Еден демонстрант бил повреден кога бил зафатен од пожар од молотов коктел што се обидел да го фрли, а полицијата го спасила откако го изгасила пожарот, а потоа го уапсила. Неколку автомобили на улиците на Солун беа уништени и оштетени.

Студенти демонстрираа и во Атина, а на улиците имаше околу 2.000 демонстранти, објави грчката полиција. Според полицијата, група од околу 200 демонстранти се обиделе да влезат во зградата на универзитетот, во што биле спречени.