Десетина вреќи со слабо радиоактивна почва собрана во близина на оштетената јапонска нуклеарна централа во Фукушима вчера беа доставени во паркот на станбениот комплекс на јапонскиот премиер, во обид јавно да се покаже дека земјата од зоната на нуклеарната централа Фукушима е безбедна.

Недолго по цунамито и нуклеарната катастрофа во март 2011 година, јапонските власти отстранија слој контаминирана почва од големи области во Фукушима со цел да се намали нивото на зрачење, објавува порталот „Јапон тудеј“.

Оттогаш, околу 14 милиони кубни метри озрачена почва од Фукушима се складирани во објекти во близина на самата нуклеарна централа, но јапонската влада вети дека ќе ја премести контаминираната почва на друга локација во земјата до 2045 година.

Поголемиот дел од складираната почва од Фукушима содржи ниски нивоа на зрачење, еднакви или пониски од зрачењето на еден рендгенски зрак, соопшти Министерството за животна средина.

Сепак, малкумина беа спремни да ја земат складираната контаминирана почва од Фукушима, поради што јапонската влада одлучи да покаже дека не е опасна.