ВИДЕО | Пет месеци затвор за учесниците во насилните протести во Ротердам

Пет месеци затвор за учесниците во насилните протести во Ротердам/ Фото: You tube

Холандскиот суд денеска осуди на затворска казна маж и жена кои учествуваа во немирите во Ротердам минатата недела, соопшти обвинителството, пренесе АП.

Демонстрациите против владините антиковид мерки прераснаа во насилство во петокот вечерта, а во еден момент полицијата пукаше врз толпата која запали оган и фрлаше со камења и пиротехнички средства кон полициските сили.

За време на немирите пет лица биле погодени со куршуми и во тек е истрага дали се повредени од полицијата.

Жената (26), која е осудена за фрлање камења по полициски возила, добила пет месеци затвор, со два месеци условна казна, а поради материјалната штета што ја предизвика ќе треба да плати 1.000 евра, објави јавниот обвинител на Ротердам на Твитер.

Холандскиот јавен сервис НОС објавил дека жената изјавила дека и е жал што учествувала во немирите.

„Да можам да го вратам времето назад, сигурно не би го направила тоа“, рекла таа.

29-годишниот маж добил и пет месеци затвор и два месеци условно. На двајцата им е забрането една година да се приближуваат на многу места во Ротердам.

Полицијата за време на тридневните немири уапсила 49 лица за учество во инцидентите.

Видео на денот