ВИДЕО: Лејкерси во трка со времето за избегнување на плеј-ин турнирот
ЛА Лејкерс сèуште има шанси да го избегне плеј-ин турнирот откако го совладаа Њујорк никс со 101:99 по продолженијата. Одлучувачките поени ги постигна Тејлен Хортон-Такер на 21 секунда до крајот, додека во продолжението постигна седум од своите 13 поени.
Лејкерси сега имаат скор од 39 победи и 30 порази и се наоѓаат на седмото место на табелата во Западната конференција, додека пред нив се Портланд и Далас кои имаат една победа повеќе.
Шампионот сè уште игра без Леброн Џејмс, а овој пат реализаторската улога ја презедоа Кајл Кузма кој даде 23 поени и Ентони Дејвис со 20 поени.
Кај Њујорк, најдобар беше поранешниот играч на Лејкерси, Џулиус Рендл со 31 поен.
Вториот тим од Лос Анџелес, Клиперс ја забележаа 46 победа со која се наоѓаат на третото место во Западната конференција. Клиперси со 115:96 го победија Торонто и ја продоложија битката за третото место со Денвер нагетс кој има победа помалку.
Најдобар кај Клиперс беше Каваи Ленард со 20 поени, а одлична партија прикажа и Ивица Зубац кој даде 18 поени и имаше 10 скокови.
Индијана пејсерс останува во игра за место во плеј-офот откако славеше над најдобриот тим на Истокот, Филаделфија со 103:94. Домантас Сабонис го искористи неиграњето на центарот на Филаделфија, Џоел Ембид, и оствари трипл-дабл од 16 поени, 13 скокови и 15 асистенции.
Милвоки со победата над Орландо од 114:102 го задржа третото место во Источната конференција и тоа благодарение на 27 поени на Јанис Адетокумпо.
Лука Дончиќ го одигра најлошиот меч во кариерата во поразот на неговиот Далас Маверикс на гостувањето кај Мемфис Гризлис од 133-104. Словенецот натпреварот го заврши со само 12 поени. Кај Мемфис најдобар беше Џа Морант со 24 поени.
Резултати:
Шарлот – Денвер 112:117
Детроит – Минесота 100:119
Бостон – Мајами 121:129
Торонто – ЛА Клиперс 96:115
Индијана – Филаделфија 103:94
Чикаго – Бруклин 107:115
Милвоки – Орландо 114:102
Сакраменто – Оклахома 122:106
Голден Стејт – Феникс 122:116