ВИДЕО | Италија е опустошена од бури и поплави, уништени се куќи и стотици автомобили
Синоќа невреме ја погоди северна Италија, оставајќи 50 изолирани лица во областа на езерото Комо, а во вторникот вечерта поради дожд и силен ветер во регионот Венето, беа регистрирани над 500 итни повици за интервенција, пренесуваат агенциите.
Во Бриено, на западниот брег на езерото Комо, поради свлечиште, жителите беа изолирани. Службите за итни случаи спасија жена која остана заробена во нејзиниот дом. Евакуирани се и други две куќи.
Штабот за цивилна заштита зборуваше за силни бури, особено над Ломбардија. Другите делови на западниот брег на езерото Комо исто така беа погодени од силен дожд, објави новинската агенција АНСА. Засега нема информации за жртвите.
„Невремето, проследено со силни налети на ветер, погоди големи делови од регионот Венето“, пренесува АНСА.
Тој додава дека противпожарната служба има добиено повеќе од 500 барања за интервенција во регионот.
Паѓањето град достигна големина на тениски топки. Мразот скрши дрвја, ги уништи покривите на куќите и искрши автомобили. Пријавена е штета од повеќе милиони долари. Уништени се куќи, полиња, лозја, насади..
Пожари во Сардинија
Во исто време, делови од Сардинија се опустошени од огромни пожари што ги гаснеа илјадници пожарникари.
Италија побара од европските земји да испратат противпожарни авиони за да и помогнат.
“Ова не се памети во историјата на Сардинија. Високите температури и ваквите климатски услови се погодни за огнената стихија. Досега, 20.000 хектари, што претставува вековна еколошка историја на островот, се претвори во пепел”, рече Алесандро Паола, заменик командант на италијанските противпожарни бригади.