На денешната прес-конференција на владините функционери поврзана со изградбата на Коридорите 8 и 10д, новинар ги праша присутните министри и вицепремиери колкава плата земале за овој месец, а првиот вицепремиерот Артан Груби му одговори „Чекај да видам“ и потоа посегна по телефонот да си ги промери месечните примања.

Изненаден од платата што ја земал, тој искоментира дека сите плати се различни и оти неговата е најмала од сите вицепремиери и премиерот, но и од претходното работно место.

-Значи сите се различни, а гледам дека мојата е најмала од сите вицепремиери и премиерот и е многу помала од моето претходно работно место, но е согласно Закон. Навистина е добро што Уставен не донесе ретроактивна одлука затоа што ако ен се лажам од 2011 е замрзнат коефициентот и по однос на платите, апсолутно нема ништо незаконски, туку се однесува на неуставна одука донесена во 2011 година за замрзнување на коефициентот и беше дебата од страна на пратениците веќе 12-13 години. Добро е што Уставниот суд не донесе одлука да важи ретроактивно, што би значело дополнителни 12 години, изјави Груби.

Според министерот за финансии Фатмир Бесими, за зголемените плати на функционерите на годишно ниво ќе бидат потребни околу 960 милиони денари бидејќи се работи за над 1000 именувани лица, а овие средства не биле предвидени во Буџетот затоа што ова не е предлог на Владата, туку на Уставниот суд.

Сега ќе треба да направиме предлог за пренамена на средствата од Буџетот за да знаеме од кои ставки ќе се префрлаат парите, вели Бесими.

Највисоките три плати, пресметани со коефициент 4,5, се на претседателот на Собранието Талат Џафери во нето-износ од 166.207 денари, на претседателот Стево Пендаровски (164.217 денари) и на премиерот Димитар Ковачевски (156.402 денари). Одлуката на Уставен суд за покачување на платите на функционерите беше донесена на 21 март годинава. Априлската плата на функционерите е покачена и до 78 отсто.