ВИДЕО: Баерн му го нанесе првиот пораз на Фрајбург во Бундеслигата
Фудбалерите на Баерн Минхен во дербито на 11 коло во Бундеслигата со 2:1 го совладаа Фрајбург и останаа на лидерското место на табелата со 28 бодови, четири повеќе од Борусија Дортмунд која ја очекува дерби пресметка со Лајпциг.
Згора на тоа, баварците му го нанесоа првиот пораз на Фрајбург во Бундеслигата и кој остана на третото место со 22 бода.
Баерн поведе со голот на Леон Горецка во 30. минута кога по асистенцијата на Томас Милер излезе сам пред голманот Флекен и немаше проблеми да ја затресе мрежата на гостите.
Надежите дека Фрајбург ќе може да го избегне првиот пораз сезонава траеја се до 75. минута кога Роберт Левандовски зголеми на 2:0. Во судиското продолжение, гостите преку Хаберер успеаја да го ублажат поразот.
Победа на домашен терен оствари и Бохум кој со 2:0 славеше над Хофенхајм. Човек на одлука беше Новотни кој во 66. минута го отвори резултатот, а во седмата минута од продолжението Пантовиќ ја потврди победата на Бохум.
Волфсбург славеше со 1:0 против Аугсбург благодарение на голот на Нмеке, додека Арминија е единствениот гостински тим кој победи. Арминијата со 0:1 го совлада Штутгарт, а стрелец на единствениот гол беше Окугава во 19. минута.