Фудбалерите на лондонски Арсенал со победа ја отворија сезоната во Премиер лигата совладувајќи го на домашен терен Нотингем форест со 2:1.

„Топџиите“ подобро влегоа во мечот, а во првите 45 минути во два наврати ја затресоа мрежата на „шумарите“. Најпрво во 26 минута Енкетиа го искористи мајсторскиот потег на Мартинели, се намести и прецизно го погоди далечниот агол од шеснаесетникот.

Потоа, само шест минути подоцна, Букајо Сака со одличен удар од работ на шеснаесетникот ја затресе мрежата, за предност од два гола.

Во текот на целиот натпревар Арсенал ја држеше топката во свој посед, а со тоа го диктираше и темпото на игра. Во финишот малку го намалија темпото, што Нотингем успеа да го искористи и го внесе натпреварот во драма во 82 минута со голот на Авонији.

До крајот на мечот немаше промена на резултатот, иако и Букајо Сака од далечина ја погоди стативата. Арсенал со тоа ги прокнижи првите три бода во новата сезона, откако Манчестер сити во петокот ја отвори сезоната со 3:0 против Барнли.