Перо Антиќ во интервјуто за познатиот портал „Јурохупс“ зборуваше на многу теми, меѓу кои и за српскиот центар на Денвер нагетс, Никола Јокиќ, моментно еден од најдобрите НБА кошаркари.

Јокиќ е првиот фаворит за освојување на МВП наградата во НБА, што би му успеал третпат по ред. Претседателот на македонската кошаркарска федерација, Антиќ, кој и самиот има големо искуство во НБА, смета дека Јокиќ може да игра уште подобро.

– Тој игра со срце. Не му е грижа за парите. Ако имаш талент и се трудиш, пари ќе дојдат. Сака кошарка и ужива во играта. Лука Дончиќ е ист. Мислам дека Јокиќ игра со 50 проценти. Ако игра со 100 отсто, кој може да замисли што може да се случи – рече Антиќ за споменатиот портал специјализиран за кошарка.

Нашиот поранешен репрезентативец зборуваше и за периодот кога настапуваше за Фенербахче каде тренер му беше Жељко Обрадовиќ, а соиграч Богдан Богдановиќ.

– Ако Жељко Обрадовиќ е луд по кошарка, Богдановиќ е двојно полуд. Тој ми беше цимер, ги гледаше натпреварите до четири часот наутро. Му реков да спие, дека имаме натпревар. Неверојатен е, му посакувам сè најдобро – се зборовите на Антиќ.