По првата официјална средба на претседателите на Америка и Русија, Џо Бајден и Владимир Путин во Женева, беше договорено дипломатите протерани од Москва и Вашингтон да се вратат на своите должности. Тие беа повлечени на почетокот на годината поради тензиите и обвинувањата на двете страни. Двајцата претседатели усвоија заедничка Декларација за стратешка нуклеарна стабилност, разговараа за сајбер-безбедноста, човековите права и улогата на Русија во дестабилизација на Украина. Бајден рече дека разговорите се одвиваат во вистинската насока, а Путин дека биле конструктивни.

За првпат од почетокот на мандатот на американскиот претседател Бајден, тој се состанува со првиот човек на Русија – Владимир Путин. Иако разговорот траеше скоро четири часа, тој беше пократок од планираното. На прашањето на новинарите зошто, Бајден одговори со прашање – кога последен пат двајцата светски лидери разговарале повеќе од два часа и додаде дека ги покриваат планираните теми.

Општата оценка од средбата е дека за многу нешта ставовите се различни но покажана е желба двете страни да се разберат Сепак, имаше тензии и несогласувања околу некои теми. Меѓу другото, во врска со сомнежите на Вашингтон за сајбер-напади координирани од Москва.

На овие обвинувања Путин изјави дека дека сајбер-просторот е исклучително важен за обете земји, како што покажа неодамнешниот напад врз американскиот систем за нафтовод во Тексас и нападот врз здравствениот систем во Русија. Путин обвини дека американската администрација не е особено заинтересирана да ги види нападите врз Русија и дека се прават инсинуации во кои само САД се жртви, но не и Русија.

Бајден рече пак соопшти дека му посочил на Путин дека некои области мора да бидат надвор од опсегот на напад и при што му доставил список од 16 дефинирани инфраструктурни објекти во САД , кои мора да бидат надвор од опсегот на напади. Се разбира, тоа треба да се покаже во пракса, одговорните земји мора да преземат мерки против поединци и ќе имаме експерти кои ќе работат на договор за тоа што е недостижно“.

Заедно со сајбер-нападот, улогата на Русија во дестабилизација на Украина може да се опише и како точка на расправија. Путин ја отфрли загриженоста на Вашингтон за зголеменото воено присуство на Русија во близина на источната граница на Украина обвинувајќи го Киев дека го прекршил договорот од Минск и дека започнал со трупање на свои воени сили во проруските области. Русија од друга страна правела воени маневри на своја територија и не загрозувала никој , изјави Путин.

И притворањето на опозициониот политичар Навални беше една од темите за кои Москва е критикувана. Бајден му посочи на Путин дека САД се чувствителни на човековите права и дека доколку на Навални нешто му се случи во затворот, алудирајќи на евентуална смрт, Русија ќе се соочи со жестока казна.

На ова Путин му одговорил дека Навални знаел дека ќе се соочи со затворска казна и намерно ја предизвикал кршејќи ја условната казна, сакајки да прикаже дека е жртва на Русија. Па и Навални да е, ќе мора да се соочи со правото и руските закони, изјавил Путин.

По средбата и горливите прашања двајцата претседатели дадоа изјави на одделни прес-конференции. Општ заклучок е дека состанокот минал во протоколарни изјави без конкретни договори. Очигледно освен демонстрацијата на желбата и покрај конфронтациите, двете страни да се разберат, ќе доминира немањето меѓусебна доверба туку само чист интерес.

Охрабрувачкиот тон од Бајден дека бил уверен дека Русија не сака нова студена војна укажува дека сепак и покрај декларативните заложби и Москва и Вашингтон се подготвени да продолжат ако треба да ја водат студената војна.

Дека освен декларативните заложби, двајцата лидери засега не направија поместување во односите е и фактот дека по средбата за прв пат во досегашната историја на средбите на претседателите , не се поканија еден со друг за официјална посета во своите држави.

Бајден го пофали Путин дека е човек кој знае што прави, а Путин дека Бајден е многу поинаков претседател од својот претходник Трамп, во позитивна конотација.

Во прилог на оценките дека средбата не ги исполнила очекувањата се приклучи и Доналд Трамп. Тој оцени дека на вчерашниот самит доминирал Путин и дека самитот бил голем дел за Русија.

САД од состанокот не добија ништо и светската сцена ѝ ја препуштија на Русија, изјави Трамп критикувајќи го Бајден дека не успеал да го спречи Путин за најважната работа, ато а е според него, запирање на изградбата на гасоводот „Северен поток 2“.

На оваа опаска од Трамп возвратија аналитичарите на СНН кои кратко оценија дека најважно е што состанокот го означи враќањето на „нормалните, возрасни луѓе“, алудирајќи на хаосот што Трамп го донесе со себе во американската политика.

А дали самитот има резултати, ќе се покаже во наредниот период по однос на бројните горливи теми во глобалната политика, каде Вашингтон и Москва имаат дијаметрално спротивставени ставови и интереси.

Општ е впечатокот дека засега многу малку конкретни работи беа договорени на вчерашниот состанок меѓу Бајден и Путин.