Двајца жители на Велес добија кривична пријава за измама и за фалсификување исправи, откако се претставувале како претставници на училиште за странски јазици и на поголем број луѓе им продале празни цд-а на кои лажно тврделе дека има материјали за учење јазици, соопшти МВР.

„Одделението за криминалистички работи Карпош при СВР Скопје поднесе кривична пријава против А.В.(30) и Д.В.(36), двајцата од Велес, поради постоење основано сомнение за сторени кривични дела „измама”, казниво по чл.247 и кривично дело „посебни случаи на фалсификување на исправи” казниво по чл.378 од Кривичниот законик“, велат од полицијата.

„Во координација со Основното јавно обвинителство Скопје, полициски службеници во полициска станица извршиле службен разговор со пријавените, при што било констатирано дека двајцата, претставувајќи се во име на правно лице – училиште за странски јазици од Скопје, преку онлајн продажба нуделе и продавале материјали (ЦД-а) за учење на странски јазици кои биле празни, односно без содржина, при што оштетиле поголем број на граѓани, стекнувајќи се со противправна имотна корист“, додаваат од МВР.