Претпријатието се подготвува за затворање на фонтаните во пресрет на зимата. Како што информираат од претпријатието Водовод и канализација, надлежно за одржување на фонтаните во централното градско подрачје, станува збор за стандардна процедура, а затворањето на фонтаните ќе се случи до крајот на месецов, но можеби и порано во зависност од временските услови.

-Започната е процедурата за затворање на фонтраните, бидејќи се влошуваат временските услови. За три недели ќе бидат покриени и исклучени. Пред да се затворат фонтаните што ги одржуваме, се прави проверка, се чистат, по што ќе следи период на конзервација се до следната пролет, велат од Водовод.

Во текот на летото, имавме стандардна процедура по која ги одржуваме фонтаните во централното градско подрачје, немавме поголеми посериозни проблеми за разлика од пред две години кога го преземавме одржувањето на фонтаните од Скопје 2014, и забележавме оштетени и украдени делови од фонтаните, додаваат од Водовод.

Фонтаните од Скопје 2014  Воин на коњ, сите фонтани од плоштадот Филип Втори, фонтаната на мостот Око, Прометеј во паркот Жена борец кои беа под ингеренции на Град Скопје, од пред две години се во ингеренција на ЈП Водовод и канализација.