Денеска од УЕФА на социјалните мрежи објавија дека уште точно 100 дена останаа до стартот на 16 по ред Европско првенство (11 јуни – 11 јули 2021 година) кое ќе се организира во 12 градови.

Македонската А репрезентација која за првпат ќе учествува на континенталните собири, се наоѓа во групата „Ц“ со Холандија, Украина и Австрија.

Првиот дуел ќе го играме против Австрија во Букурешт на 13 јуни, четири дена подоцна во романскиот главен град ќе се соочиме и со Украинците, а на 21 јуни во Амстердам ривали ни се можеби најголемите фаворити во групната фаза, Холанѓаните.

Поради ситуацијата со ковид-19 и натаму е неизвесно дали ќе се одржи ова ЕП со навивачи на стадионите. Во изминатиот период беше објавено дека Велика Британија е подготвена да преземе организација на повеќе натпревари од ЕП.

Се најавува дека во наредниот месец УЕФА ќе донесе конечна одлука околу тоа дали ќе ја има поддршката од трибините, со или без навивачи, или со одреден капацитет на стадионите.