Унгарската претседателка бара Финска и Шведска да влезат во НАТО „што е можно поскоро“
Унгарската претседателка Каталин Новак побара од пратениците „што е можно поскоро“ да го ратификуваат влезот на Финска и Шведска во НАТО. Пратениците денеска почнаа да расправаат за предлозите по неколку месеци без напредок во парламентот. „Тоа е сложена одлука, со сериозни последици, затоа треба внимателно да се размисли“, напиша Новак на Фејсбук.
„Мојот став е јасен: во сегашната ситуација приемот на Шведска и Финска е оправдан. Верувам дека Националното собрание ќе донесе мудра одлука што е можно поскоро“, додаде таа. Сите земји членки на НАТО, освен Унгарија и Турција, го ратификуваа влезот на двете нордиски земји кои аплицираа за НАТО минатиот мај по руската инвазија на Украина.
Пристапувањето на новите членки мора да го ратификуваат сите сојузници, од кои 30, а Турција веќе неколку месеци го блокира овој процес и бара законски измени бидејќи, како што тврди, Шведска сочувствува и ги поддржува курдските терористи.
Генералниот секретар на НАТО Јенс Столтенберг вчера го повтори повикот до Турција и Унгарија да им дозволат на Финска и Шведска да се приклучат на западната воена алијанса. „Време е да се ратификуваат и целосно да се поздрават и Финска и Шведска како членки“, рече Столтенберг во Хелсинки, говорејќи заедно со финската премиерка Сана Марин.