Како точно изгледа начинот на детекција на коронавирусот во Македонија и што точно медицинските експерти од областа на епидемиологијата тестираат кај суспектните пациенти? На секое лице кое е суспектно за Ковид-19 најнапред му се прави скрининг тест, односно тест за детекција на Е генот. Доколку овој тест е негативен, тогаш и одговорот на резултатот за тој примерок е негативен. Ако се добие негативен резултат на скринингот од пациент со голема сомнителност за Ковид-19 пак, особено ако се работи за примерок од горно респираторниот тракт, тогаш е потребно да се достави втор примерок, со вклучување примерок од долнореспираторен тракт.

Меѓутоа, како што е објавено во Упатството за начин и интерпретација на резултати на тестови за Ковид-19 на веб страницата на Институтот за јавно здравје, еден или повеќе негативни резултати, не ја исклучуваат можноста да постои Ковид-19. Причината за ова е што бројни фактори можат да бидат причина за негативен резултат. Меѓу нив се тоа примерокот кој што е земен да има мала количина вирусни честички, примерокот да е земен многу рано или многу доцна од инфекцијата, примерокот да не е чуван или транспортиран соодветно, ако вирусот мутирал.

Доколку скрининг тестот е позитивен, се прави уште еден конфирматорен тест. Ако двата се позитивни, пациентот е позитивен.

Во случај на позитивен скрининг тест, а негативен конфирматорен тест потребно е да се донесе нов примерок од пациентот. И во овој случај, инфекцијата не се исклучува и случајот се води како веројатен.