Премиерот Риши Сунак ги повика своите пратеници да не создаваат „уште една Вестминстерска драма“, во време кога тој се обидува да ја добие нивната поддршка за новиот договор за Брегзит.

Тој им порача на ториевците да и дадат „време и простор“ на Демократската унионистичка партија (ДУП) да го разгледа договорот, пренесува „Би-Би-Си“.

Договорот со ЕУ има за цел да ги реши проблемите со трговските аранжмани за Северна Ирска по Брегзит. Поддршката на ДУП ќе биде клучна за обновување на владата за поделба на власта во Северна Ирска.

Вчера Сунак се обрати до влијателниот комитет на ториевците за да го претстави договорот. По состанокот, министерот за Северна Ирска, Стив Бејкер, им рече на новинарите дека договорот е „добар колку што ќе го постигнеме“, што укажува дека владата нема повторно да ги отвори преговорите со ЕУ.