Како што информираат италијанските и шпанските медиуми, Јувентус во јануари ќе ангажира две големи имиња од „кралскиот“ клуб, односно се тврди дека во Торино од наредната година ќе играат Иско и Марсело.

За Иско на Реал Мадрид ќе му бидат платени 40 милиони евра, додека Марсело ќе добие раскин на договорот за да потпише со Јуве. Иско моментно заработува седум милиони евра годишно, додека неговиот соиграч од Реал Мадрид, Марсело, дури 12 милиони.

Тоа ќе ги натера првите луѓе од мадридскиот гиганти на ваков потег со оглед на ситуацијата со коронавирусот и фактот дека тренерот Зинедин Зидан не ги гледа овие двајца фудбалери во својот тим во блиска иднина.

Дали со овие имиња конечно италијанскиот шампион после 25 години повторно ќе се искачи на европскиот врв? Во новата сезона од ЛШ, во групата „Г“ играчите на Андреа Пирло стартуваа сигурно со гостински триумф над Динамо Киев (0:2). Во второто коло од Лигата на шампионите Јувентус го чека тежок дуел наредната среда (28 октомври) на домашен терен против Барселона.

Последен пат „Старата дама“ беше најдобра во фудбалска Европа во далечната 1996 година, а во меѓувреме беше и во финалето во 1997, 1998, 2003, 2015 и 2017 година.