Средношколскиот сојуз викендов ќе бира една од двете можности за полагање матура
Иако не се постигна конечно решение, генерално се разработуваа два предлога за државната матура, вели пратеникот Бојан Стојаноски за „Слободен печат“, ои расправата што се одржа на иницијатива на собранискиот Клуб за младински прашања и политики.
– Едниот предлог е матурантите да полагаат два екстерни испита, додека за двата интерни да се изведе средна оценка од четирите години. Клубот за младински прашања предложи и втора опција, а тоа е да се полагаат четири предмети од државната матура по скратени програми – додава Стојаноски.
За матурантите е поприфатлива првата опција, но според Стојаноски, оставаат да закажат седница на Средношколскиот сојуз, каде се очекува да формираат конечен став за тоа која од овие опции е најприфатлива за нив. Она што е важно е дека за двете опции не се потребни законски измени. И лидерот на Средношколскиот сојуз, Бленди Ходаи, за „Слободен печат“ потврди дека во текот на викендот ќе одржат средба и ќе се одлучат за компромисно решение.
На дебатата присуствуваа претставници на Сојузот на средношколци и од кабинетот на министерката за образование и наука Мила Царовска, која поради контакт со заразен од ковид-19 е во изолација и не присуствуваше на дебатата.