Девет минофрлачки гранати експлодираа во зградата на Владата во сомалискиот град Дусмареб, каде во истиот момент се наоѓал и претседателот Мохамед Абдулахи Мохамед.

Засега нема информации за евентуални жртви, а властите се сомневаат дека за нападот е одговорна исламистичката терористичка група Ал Шабаб, поврзана со мрежата Ал Каеда.

Претседателот пристигнал вчера во Дусмареб на преговори со петмина регионални лидери околу претстојните претседателски и парламентарни избори. Мандатот на шефот на државата истекува на 8 февруари, а датумот за одржување на изборите се уште не е одреден поради несогласувања.

Мохамед Абдулахи Мохамед најави дека планира да се кандидира на претстојните избори, а главниот состанок со регионалните лидери беше закажан за денеска.

Обезбедувањето околу владината зграда во Дусмареб е зајакнато, а низ градот патролираат воени единици.

Во истиот град претходно денеска одекна експлозија и во близина на аеродромот. Медиумите објавуваат дека станува збор за обид за убиство на командантот на сомалиската копнена војска, но досега нема соопштение за неговата состојба.