Манчестер јунајтед доживеа вистински дебакл во 35. коло од Премиер лигата, губејќи со 4:0 на гостувањето кај Евертон. Менаџерот Оле Гунар Солскјер изјави дека неговиот тим бил лош во сите делови од фудбалската игра.

– Бевме поразени во сите делови од играта. Единствен сегмент во кој го победивме Евертон, ако може така да се каже, е поддршката која ја имавме од трибините. Затоа сакам да им се извинам на сите навивачи за тоа што им го приредивме. Имавме период на добри резултати. Тешко е да се влезе меѓу најдобрите четири екипи, не зборуваме за освојување на титулата. Пред нас е многу работа, мораме да се подготвиме за финишот од сезоната – изјави Солскјер.

Манчестер јунајтед со поразот од 4:0 постави уште еден клупски антирекорд по бројот на примени голови во една сезона. „Црвените ѓаволи“ досега примија дури 48 голови, со што екипата која сезонава ја предводеа Солскјер и Жозе Мурињо го надмина неславниот рекорд од сезоните 1999/00 и 2001/02, кога примија по 45 голови.

Оваа бројка може да се зголеми бидејќи во наредните два натпревари, Манчестер јунајтед го очекуваат дуели со градскиот ривал и со Челси во директна пресметка за четвртата позиција која носи пласман во ЛШ.