Од 15 декември ќе стартува доделувањето на вкупно 3.852 парични награди во вкупен фонд од половина милион евра со скенирање на фискалните сметки преку апликацијата МојДДВ.

Наградната игра МојДДВ #МојаНаграда ќе трае една година, како што соопштија од Министерството за финансии, а за тој период ќе се доделат две премии од 50.000 евра, месечно ќе се доделуваат 15 награди по 100.000 денари и дневно ќе се доделуваат 10 награди од по 1.000, 2.000 и 3.000 денари.

– Дневните награди ќе се извлекуваат со електронски генератор, а на апликацијата МојДДВ на секој добитник ќе му стига порака која сума ја добил. Доколку нема награда, на апликацијата ќе стигне едукативна порака, во духот на финансиската едукација – велат од Министерството за финансии.

На месечно ниво ќе има 12 кола на извлекување, а сите сметки кои биле скенирани, а не биле добитни за дневни награди, ќе учестуваат во месечното извлекување. Двете главни награди ќе бидат во вредност од 50.000 евра и тоа едната ќе биде извлечена во март, а другата на крајот на наградната игра во декември 2020 година. За месечните награди од по 100.000 денари и премиите од 50.000 евра, ќе има јавни извлекувања, појаснуваат од Финансии.

Целта на МојДДВ #МојаНаграда, како што кажа министерката за финансии Нина Ангеловска вчера на прес-конференција е да биде засилување на мерката МојДДВ – која патем дава одлични резултати во сузбивањето на сивата економија. Таа посочи дека МојДДВ #МојаНаграда треба да ги мотивира луѓето да ги скенираат и оние сметки со помали суми на ДДВ, , кои претходно не ги скенирале, како и да ги натера да продолжат да скенираат сметки откако ќе го надминат месечниот праг за поврат на ДДВ.

– При дизајнирањето на #МојаНаграда биле земени најдобрите практики од другите земји, од извештаи на Европската комисија. Таа посочи дека покрај сузбивањето на сивата економија, преку наградната игра ќе се врши и финансиска едукација на граѓаните и подигање на даночниот морал преку едукативни пораки – рече Ангеловска.