Шест погреби е дневниот просек на гробиштата во Солун како последица на вирусот: Починатите од ковид-19 се закопуваат во „посебен реон“
Заменик-градоначалникот на Солун, Јоргос Арвалис, за информативниот портал „Вориа”, вели дека во градот, во просек, има по шест погреби дневно на лица кои ја загубиле битката со коронавирусот, јави дописничката на МИА од Атина.
Порталот коментира дека бројот на смртни случаи на дневно ниво во Солун е значително повисок во споредба со првиот бран, а на градските гробишта постои посебен дел со гробни места за оние кои починале од коронавирусот.
– Секојдневно во просек имаме по шест погреби на луѓе кои починале од ковид. Најмногу имавме осум, а најмалку четири. Побројни се во споредба со март, кога ја одредивме областа и ги отворивме првите 50 гробни места. Во тој период имавме малку починати и не беа секој ден, вели Јоргос Арвалис заменик- градоначалникот на Солун надлежен за деловно планирање, дигитално управување и миграциска политика.
Арвалис додава дека до минатиот четврток биле исполнети околу 50 гробници, а денеска се веќе 83.