Историското, прво коло од Конференциската лига донесе убедлива победа за Рома на Олимпико против ЦСКА Софија. Заврши со конечен резултат 5:1 за римската „волчица“.

Мечот во Рим започна со неочекувано водство на Бугарите, но Рома до крајот постигна пет гола и лесно стигна до првите бодови. Два гола постигна Лоренцо Пелегрини, а по еден Ел Шарави, Манчини и Абрахам.

Убедливата победа не го натера тренерот на италијанскиот клуб, Жозе Мурињо да го пофали тимот. Тој рече дека не му се допадна начинот на кој играше неговата екипа на овој дуел, дека не беше квалитетен.

Но, триумфот го стави Мурињо во клупската историја на Рома.

Само третпат од основањето на клубот во 1927 година, Рома забележа шест победи од шест стартни натпревари во една сезона. Досега, тоа го правеше двапати, двата пати под водство на Руди Гарсија во сезоните 2013/14 и 2014/15.