Севернокорејските државни медиуми тврдат дека сираците во таа земја доброволно аплицираат да работат во државните рудници, пренесува Би-Би-Си.

Државната новинска агенција објави дека стотици деца „во најголемата младост смело и мудро одбрале да работат физичка работа за државата“.

Нивната возраст не е објавена, но од фотографиите може да се заклучи дека станува збор за тинејџери.

Групите за човекови права долго време ја обвинуваат Северна Кореја дека користи деца за присилна работа, нешто што властите упорно го негираат.

Волонтираат 700 сирачиња

Денес беше објавено дека 700 деца без родители се пријавиле доброволно да работат во фабрики, на земјоделско земјиште и во шуми.

Во четвртокот, државната агенција објави дека „десетици сирачиња притрчаа во комплексот за ископ на јаглен во областа Кона, сакајќи да ја исполнат заклетвата дека ѝ враќаат на државата само милионити дел од љубовта што партијата им ја покажува“.

Во февруари годинава, Би-Би-Си напиша дека генерации јужнокорејски воени заробеници се користат како робови во севернокорејските рудници за јаглен, а парите од нивната работа биле за режимот и неговата програма за оружје.

Се проценува дека околу 26 милиони луѓе живеат во Северна Кореја, земја во која сите сегменти од животот на нејзините жители се под владина контрола.

Извор: Индекс.хр