Сега може да спиете заедно со лавови и тигри во Кент (ФОТО+ВИДЕО)
Безбедно спиење во близина на лавови и тигри досега беше возможно само на некои далечни дестинации како Африка и Азија, но сега постои таква опција и во хотелот Порт Лимпни во Кент. Хотелот располага со прекрасни бунгалови со пет ѕвезди сместени среде сафари парк.
Може да изберете бунгалов блиску до диви животни како лавови, тигри, мечки и волци. Тоа значи дека може да јадете, спиете или да се капете на само неколку сантиметри од нив.
Бунгаловот кај лавовите е особено импресивен. Тој е прв во светот од овој тип, со огромни прозори во дневната и спалната соба, така што гостите никогаш не се далеку од величествените предатори кои живеат во паркот. Градбата е од отворен тип, со скандинавски бањи на отворено поставени на изолирани платформи. Просторниот апартман овозможува несекојдневен поглед на лавовите Адрас, Одрика и нивните три мали лавчиња, додека спиралните скали водат до мезанинот со два кревета за возрасни и два за деца. Бунгаловот е опремен со бар, висечки лустери, приватна тераса и градини.
Едно ноќевање во овој апартман чини 1750 фунти и цената вклучува појадок, шише шампањ за добредојде, сафари, пристап до хотелот Порт Лимпни, како и до паркот со диви животни.
Другите бунгалови може да се изнајмат по пониска цена, па така ноќевање во бунгаловот кај тигрите чини 1000, кај волците 549, а во оној кај мечките 350 фунти.