Се продолжува булеварот Борис Трајковски: Над 70.000 граѓани побрзо ќе стигнуваат на посакуваната дестинација
Градежните активности околу продолжувањето на булеварот Борис Трајковски до населбата Драчево во Општина Кисела течат во полн ек, информираат од оваа скопска општина.
Градоначалникот Орце Ѓорѓиевски, заедно со претставник од Градот Скопје кој е директно задолжен за изведбата, во координација со Кисела Вода, извршија увид во динамиката на активностите на терен. На овој потег кој води од населбата Пинтија до влезот на Драчево, пред мостот на Маркова река, се изведува модерно булеварско решение во должина од над два километри, кое е продолжение на булеварот кој води низ Кисела Вода – објаснуваат од Општина Кисела Вода.
Инаку, во моментов, се работи на процесот на експропријација на приватното земјиште, кое во најголем процент е во сопственост на деловни субјекти.
– Очекуваната временска рамка за завршување на овој голем инфраструктурен проект е до крајот на оваа година. Истиот, ќе го намали метежот, ќе ја зголеми безбедноста и ќе го олесни сообраќајот за преку 70 000 лица од Кисела Вода, Драчево, Пинтија, Лисиче, Студеничани и околните населени места кои секојдневно ја користат оваа делница, а дополнително, бенефит ќе имаа и за индустриската зона лоцирана во овој дел на градот – информираат од Општина Кисела Вода.
Како што информираа градските власти на почетокот на изградбата на ова сообраќајно решение, станува збор за капитален инфраструктурен проект со кој ќе се продолжи булеварското решение на потег од влезот во населбата Пинтија до Драчево, во должина од над два километри.
– На овој потег оваа сообраќајница ќе се реконструира и прошири и ќе прерасне во модерен булевар со четири сообраќајни ленти, пешачки и велосипедски патеки, модерно и енергетски-ефикасно јавно осветлување, како и дополнителна комунална инфраструктура – соопштија тогаш градските власти.