Директорот на Фондот за здравствено осигурување (ФЗО) Сашо Клековски соопшти дека за 40 отсто се намалува цената на два важни теста за рано откривање на рак на грлото на матката.

​Едниот е Ликвид ПАП-тест, чија цена е намалена од 2.200 денари на 1.250 денари, истовремено е намалувањето на партиципацијата за корисничките од 250 на 150 македонски денари.​ Вториот тест чија цена се намалува е ХПВ генотипизацијата, чија цена се намалува од 5.500 денари на 3.310 денари,  а партиципацијата се намалува од 550 денари на 350 денари. Ревидираната цена на ХПВ-тестот е од 1 мај, а за Ликвид ПАП-тестот од 9 јуни.

Целта, како што рече Клековски е превентивните здравствени услуги да бидат подостапни за граѓаните. Со намалувањето на цените се овозможува повеќе жени навреме да направат скрининг, бидејќи раното откривање спасува животи, нагласи Клековски.

„Целта е да стигнеме до 140.000 ПАП тестови спрема податоците што ги имаме, а во моментот се прават од сите програми заедно околу 70.000 теста. ​Морам да нагласам дека овие податоци се само од установи со кои Фондот има договор, не се од установи со кои нема договор. Во недостаток на гинеколози и цитолози и патолози, Ликвид ПАП-от е иднината на ПАП-тестот, условно да кажам, бидејќи овозможува употреба на вештачка интелигенција и трпи позначаен транспорт отколку обичниот ПАП. ​А ХПВ тестот е тестот на иднината бидејќи има поголема точност, има точност од 95 отсто и не мора да се прави на три години, може да се прави на пет години“, кажа Клековски.

Директорот рече дека целта е да има повеќе Ликвид ПАП-тестови, бидејќи технички и технолошки е поедноставен за да стигнеме до побрзи резултати.

„Знаете дека брзината на резултатите е многу важна. А понатаму, со развој на можностите, полека размислуваме за ХПВ тестот како стандард за рано откривање на рак на грло на матка. ​Јас го ставам акцентот на овој тип на рак бидејќи овој тип на рак, заедно на пример со меланомот, се ракови што комплетно можат да бидат рано откриени и за ниска цена на рано откривање да спасиме животи и да заштедиме многу финансии на Фондот“, додаде тој.

Воедно, беше кажано и дека Фондот обезбеди и континуитет во снабдувањето со терапија за пациентите кои користат лекови со активна супстанција топирамат за третман на епилепсија.

ФЗОМ бара решение за проблемите при исплата на породилното боледување, тврди Клековски