Новиот „Сантијаго Бернабеу“ ќе биде готов за сезоната 2022/23, а идејата на претседателот Флорентино Перез е стадионот да го претвори во мултифункционален објект на кој во текот на целата година ќе се одржуваат спортски и културни настани. Перез сака „Сантијаго Бернабеу“ да биде вистинска фабрика за пари која ќе му овозможи на Реал Мадрид да доминира во Шпанија и во Европа.

Еден од настаните кои Перез сака да бидат традиционални на „Сантијаго Бернабеу“ се натпреварите од НФЛ лигата кои генерираат најмногу пари во светот на спортот. Според ЕСПН, НФЛ лигата и екипите кои учествуваат во неа, секоја сезона заработуваат неверојатни 13 милијарди долари.

Во последните години, популарноста на НФЛ лигата во Шпанија расте со голема брзина и Перез сака да го искористи тој тренд и по примерот на Тотенхем кој им го понуди својот стадион на челниците на НФЛ лигата, истото да го стори и тој.

Се очекува првиот НФЛ натпревар на „Сантијаго Бернабеу“ да се одигра 2024 година, а можеби и една година поради. Челниците на НФЛ лигата не откриваат дали имало разговори на оваа тема но ниту не демантираат било какви преговори со Реал Мадрид.

Идејата на НФЛ лигата е пред да дојде во Шпанија, да организира натпревари во Германија и постои голема можност во 2022 и 2023 година да се одигра по еден натпревар на „Алијанц“ Арената во Минхен. Причината за ваквото размислување е што последниот Супер Бол го следеле најмалку два милиони Германци.