Разоткриен дополнителен имот на Груевски – станови препишани на мајката Надежда и на секретарката
Основното јавно обвинителство од утрови ги чешла становите кои како дополнителен имот се откриени во истрагата за плацевите на Водно на поранешниот премиер Никола Груевски кој речиси две ипол години е во бегство и живее во Будимпешта со унгарски азил. За новооткриените недвижности постои основано сомнение дека се купени со пари на членството на ВМРО-ДПМНЕ.
Во рамки на истрагата за плацевите на Водно, купени со пари од членството на ВМРО-ДПМНЕ, екс премиерот Никола Груевски е првоосомничен, а купопродажбата на луксузните објекти е извршена преку фирмата на неговиот поранешен кум Ристо Новачевски кој е третоосомничен во овој случај. Истрагата за перење на пари ги товари и Сашо Мијалков и Орце Камчев како второ и четвртоосомничени, поради што пред две недели во притвор се најде и богатиот бизнисмен. Неговата мајка Ратка Камчева е исто така меѓу осомничените во случајот.
„Пари кои му биле доверени во работата како претседател на една политичка партија ги присвоил за себе или дел од тие пари со тоа што донации од физички и правни лица не ги пријавувал во извештаите и нели секоја партија мора да има список на донатори на физички и правни лица. Дел од физичките и правни лица вопшто не се во списокот на донатори,а донирале средства за партијата“, рече обвинителката Вилма Русковска кога пред повеќе од една година го презентираше случајот во јавноста.
