Разликата помеѓу најстариот и најмладиот учесник на ЕП е точно 20 години
За девет дена, на 11 јуни ќе започне Европското првенство на кое за прв пат ќе настапи и фудбалската репрезентација на Македонија. Евро 2020 ќе биде отворено со натпреварот Италија – Турција кој ќе се игра на „Олимпико“ во Рим, а големото финале ќе се игра на 11 јули на „Вембли“ во Лондон.
На ЕП за прв пат ќе настапат 32 репрезентации, а статистичарите веќе почнаа со својата работа и веќе ги открија настариот и најмладиот фудбалер кои ќе се настапат на континенталниот собир.
Најстариот играч кој е пријавен за настап на ЕП е шкотскиот голман Крег Гордон кој има дури 38 години. Станува збор за голман кој бранел за Хартс, Селтик и Сандерленд, а во 2012 година ја прекина кариерата поради тешката повреда на коленото.
– Кога ми истече договорот со Сандерленд мислев дека тоа е тоа. Болките беа ужасно, воопшто не можев да го свиткам коленото, а по скали морав да се спуштам наназад. Но, по една година исцрпувачки терапии, успеав да се вратам на тренинзите. Имаше моменти кога сакав да се откажам од се, болката беше преголема, но со поддршка на сопругата се вратив – вели Гордон кој по опоравувањето од повредата потпиша за Селтик. Досега има 56 настапи за репрезентацијата на Шкотска.
Најмлад фудбалер на ЕП ќе биде уште фудбалер од групата Д, тоа е 18-годишниот напаѓач на Чешка, Адам Хложек кој игра за Спарта Прага.
Хлажек поради повреда пропушти поголем дел од сезоната и настапи на само 23 натпревари кои му беа доволни за да постигне 15 гола и да има девет асистенции. Скор со кој го заслужи повикот да биде дел репрезентацијата на Чешка на ЕП.