Јавен обвинител од Основното јавно обвинителство Скопје започна истрата против две лица, осомничени дека вчера извршиле кривично дело разбојништво.

Разбојниците се на возраст од 23 и 22 години. Тие по претходен договор, заедно влегле во објект на заложната куќа „Астра кредити“, на улица „Лондонска“ во Скопје, и со закана кон еден вработен дека непосредно ќе нападнат врз неговиот живот, одзеле пари. Едниот осомничен, држејќи пиштол марка „Pietro Bereta“ во раката, побарал од оштетениот да го отвори сефот и да ги извади парите.

Оштетениот постапил по ваквата наредба, го отворил сефот и му дал 120.000 денари. По ова, вториот осомничен самиот се приближил до сефот и го зел остатокот од 180.000 денари кои се наоѓале внатре. Двајцата осомничени со мотор кој бил паркиран во близина на заложната куќа избегале.