Путин за повикот од Лукашенко: Се уште нема потреба од руски сили во Белорусија
Рускиот претседател Владимир Путин изјави денеска дека ситуацијата во Белорусија се стабилизира и дека нема потреба да се користат руските сили во таа земја.
Путин рекол дека се надева дека во иднина нема да има потреба за тоа, за што и Минск се сложува.
Рускиот претседател потсети дека, според документите за соработка на Русија и Белорусија, секоја земја „треба да и помогне на другата во заштита на нејзиниот суверенитет, надворешни граници и стабилност“.
– Со тоа, ние имаме обврска спрема Белорусија и Александар Лукашенко рече дека би сакал да му испратиме помош, ако тоа биде неопходно. Реков дека Русија ќе ги исполни сите свои обврски, нагласи Путин.
Рускиот претседател рекол дека руските сили нема да бидат користени „се додека екстремистите во Белорусија не пројдат одредени граници“, пренесува Спутник.
– Нема да бидат користени се додека екстремистичките елементи, кои се кријат позади политичките пароли, не пројдат одредени граници, едноставно почнат да ограбуваат, да палат автомобили, куќи, банки, да пробуваат да заземат административни згради и останато, додал рускиот претседател.
Повеќе од 6.700 луѓе биле приведени во Белорусија за време на првите неколку дена од масовните протести по претседателските избори на 9 август, се наведува во официјалните податоци. Стотици луѓе се повредени во немирите, вклучувајќи и повеќе од 150 припадници на безбедносните сили.