Промоција на две книги од Тихомир Јанчовски во Берово
Во Берово утре ќе бидат промовирани новите две книги поезија на Тихомир Јанчовски: „Пред некое време“ и „Несреден век“. Промотор ќе биде Тања Аждаја, а учествуваат и Анѓа Русо и Горазд Китановски-Кени.
– Бидејќи во Берово вистинска промоција на книга, во вид на поетски перформанс, не се одржала никогаш, од ослободувањето на Македонија до денес, се надевам дека оваа ќе го отвори патот и за други такви настани во Малешевијата, каде што културниот живот е оскуден и подзаборавен од централните власти и е исполнет само со фолклорни настани и гостувања на естрадни уметници – вели Јанчовски.
Бидејќи по потекло се од таму, тој и Тања Аждаја го организираат овој спектакл во сопствена режија, за и во нивниот крај да видат една современа поетска претстава, и веруваат дека тоа ќе инспирира многумина млади луѓе од Берово, Пехчево, Русиново, Робово и од другите села во иднина сериозно да се занимаваат со уметноста на зборот.